|
Loen – Lodalen:
Loen, Lodalen og Rake ligg i hjartet av det
vakre og dramatiske landskapet mellom inste
delen av Nordfjord og dei mektige snø- og
ismengdene på Jostedalsbreen. Loen er ein av
mange innfallsportar til Jostedalsbreen
Nasjonalpark i indre Nordfjord. Bygda Loen har
om lag 600 innbyggjarar. I tillegg til turisme
er industri og jordbruk dei viktigaste
næringsvegane for folket i bygda.
Det grøne brevatnet i Loelva renn midt i den
fruktbare dalen, omkransa av dyrka mark og
frukthagar. I liene under dei bratte fjella veks
tett bjørkeskog. Skåla (1848 moh.) med den
hesteskoforma åsen ruvar i aust og dominerer
utsynet mot Loen frå vest. På toppen av fjellet
står eit rundt steintårn, reist av bygdefolk i
1891, der fjellfolk kan søkje ly. Årleg vert det
arrangert eit løp opp til Skåla og Skålatårnet.
Løpet er ei kraftprøve der beste tid for herrar
er 1 time, 9 minutt og 9 sekund, og for damer er
tida 1 time, 21 minutt og 50 sekund.
Tre gongar i det førre hundreåret har naturen
sjølv gripe uroande inn og omforma landskapet i
Lodalen. To gonger gjekk menneskeliv tapt og det
vart valda store materielle skadar. Den 15.
januar 1905 rasa det ut eit stort stykke av
Ramnefjellet rett overfor Bødal. Ei flodbølgje
feia inn over dei lågtliggjande gardane i Bødal
og Nesdal og 63 menneske omkom. Dette var to
tredjedelar av innbyggjarane i Lodalen.
Flodbølgja knuste bygningar og slengde ein
dampbåt 400 meter opp i lia. Den 13. september
1936 kom det eit nytt ras frå Ramnefjellet.
Denne gongen vart til saman 74 personar drepne.
Til all lukke omkom det ingen menneske då det
kom eit tredje steinras i 1950. Fjellskreda i
Ramnefjellet er dei største i Noregshistoria. I
Ramnefjellet kan ein den dag i dag sjå tydelege
sår der steinmassane rasa ut. Det er sett opp ei
minnetavle over dei som ein aldri fann att etter
ulukkene, samt ei informasjonstavle med
historisk dokumentasjon og bilete frå
Ramnefjellet, Bødal og Nesdal. Like ved
minnetavla byrjar ein pilegrimssti/ ei historisk
vandring som handlar om dei dramatiske
hendingane som har funne stad i Lodalen. Denne
naturstien er verdt å få med seg!
Med dette vil vi ynskje Dykk alle velkomne til
Loen og Lodalen. |
|
