|
Olden – Oldedalen:
Av dei tre korte fjordarmane inst i Nordfjord
endar den sørlegaste i Olden. Her strekkjer den
vakre Oldedalen seg om lag 20 km innover mellom
fossar, vatn og fjell med glinsande brear. I
over hundre år har Olden og Oldedalen vore
vertskap for tusenvis av besøkande. Det er den
sterke naturopplevinga som gjer staden så
attraktiv. Med eit stort spekter av fjord,
fjell, vatn, fossar og bre blir Olden og
Oldedalen rekna som eit av Noregs vakraste
reisemål. Det er såleis ikkje tilfeldig at dei
fyrste turistane byrja å kome hit på slutten av
1800–talet. Dei fyrste turistane som kom var
engelskmennene, gjerne overklassa, som hadde god
råd og god tid. Frå cruisebåtane, ”dei flytande
hotella”, på fjorden i Olden drog dei på
oppdagarferd inn over dalane. Engelskmennene
kalla ofte Noreg for ”the northern playground” ,
og det var fjella og breane som fascinerte dei.
Briksdalsbreen, som ligg lengst inne i
Oldedalen, var då som i dag det store
trekkplasteret for turistane.
Briksdalsbreen og Melkevollsbreen ligg i enden
av Oldedalen. Begge breane er utløparar av
Jostedalsbreen. Fjellheimen rundt bygdene Olden
og Oldedalen ligg inne i Jostedalsbreen
Nasjonalpark. Nasjonalparken vart danna i 1991
og er 1310 km2 stor. Sjølve Jostedalsbreen
utgjer heile 487 km2 av nasjonalparken. Breen
har opp gjennom hundreåra vore ein viktig
ferdaveg for folk og fe over til Sogn på den
andre sida. Samstundes har den vore årsak til
ulukker og uår når breen har gjort store
framrykk. Det siste store framrykket byrja på
1600-talet og varte fram til 1770. Dette var år
prega av flaum, snøskred, fjellskred, jordskred
og isras forårsaka av breen si herjingar. Denne
tida vart ofte kalla for ”den vesle istid”.
Briksdalsbreen er eit av dei mest besøkte
naturbaserte reisemåla i Noreg. Heile 300 000
menneske tek turen opp til breen i løpet av ein
sesong. Den idylliske vegen opp til breen vart
laga i 1927/28 og slyngar seg gjennom frodig og
storslagen natur. På den nedste brua langs vegen
kan ein få seg ein avkjølande dusj av den
brusande breelva. Turen opp til breen kan
gjerast til fots eller i ein av Oldedalen Skyss
AS sine ”Trollbilar”. Dei som ynskjer å kome
verkleg nær inn til breen kan delta på bresafari
i gummibåtar ute på vatnet framfor breen. Når
ein har opplevd Briksdalsbreen på nært hald er
det alltid godt å slappe av på Briksdalsbre
Fjellstove, nyte litt god mat og godt drikke
eller ta seg ein shoppingrunde i
suvenirbutikken.
Med dette vil vi ynskje Dykk alle
velkomne
til Olden og Oldedalen.
|
 |
